ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានប្រកាសថារាជរដ្ឋាភិបាលនឹងមិនយកថ្លៃចាក់វ៉ាក់សាំងពីប្រជាពលរដ្ឋនោះទេ ដើម្បីជួយដល់ជីវភាពពលរដ្ឋ និងថាការដែលយកលុយថ្លៃចាក់វ៉ាក់សាំងអាចបង្ករជាអំពើរពុករលួយ។

ថ្លែងនៅក្នុងពិធីជួបសំណេះសំណាលជាមួយក្រុមគ្រូពេទ្យសម្តេចតេជោ ប្រឆាំងកូវីដ១៩ ធ្វើឡើងនៅសាលពិព័ណ៍ជ្រោយចង្វារ រាជធានីភ្នំពេញ សម្តេចតេជោ ហ៊ុន សែន លើកឡើងថា បើសិនជាចាក់វ៉ាក់សាំងយកលុយពីប្រជាពលរដ្ឋអាចមានតម្លៃពី ១០ ទៅ ១៥ ដុល្លារ អាចនឹងមានអ្នកខិលខូចប្រព្រឹត្តិអំពើរពុករលួយហ៊ានយកដល់ ២០ដុល្លារជាដើម។

សម្តេចបានបញ្ជាក់ច្បាស់ថា៖ «ពេលនេះមិនមែនជាពេលវេលាដើម្បីយកលុយប្រជាជនទេ គឺត្រូវជួយប្រជាជន»។

សម្តេចបន្តថា យើងមិនអាចយកថ្លៃចាក់វ៉ាក់សាំង ហើយឱ្យប្រជាពលរដ្ឋមានជីវភាពខ្វះខាតខ្ចីលុយគេមកចាក់ និងធ្វើឱ្យពួកគាត់កាន់តែខ្វះចាតថែមទៀត សម្ដេចបញ្ជាក់ថាក្រៅពីចាក់វ៉ាក់សាំង និងព្យាបាលមិនយកលុយ រដ្ឋក៏ចិញ្ចឹមប្រជាពលរដ្ឋដែលរងគ្រោះជារៀងរាល់ខែផងដែរ៕